Putol nga ulo nakit-an

CEBU, Philippines - Usa ka putol nga ulo nga hapit nang makalabira nga iya sa tawo ang nakit-an diha sa bakilid sa sitio Camp 5, barangay Camp 4, dakbayan sa Talisay niadtong Miyerkules sa hapon.

Si Inspector Margienette Yosores nga nahinabi sa Banat News kagahapon nagtuong biktima sa pag-salvage ang maong tawo apan gituohan nila nga wala kini patya sa maong lugar kondili gilabay ra kini, duna say pagdudang posibleng gilubong na ang lawas niini sa wala pa matinong dapit.

Ang barangay kapitan nga si Luciano Cabingatan daling mi-report sa kapolisan kabahin sa maong kalabira. Sila si Senior Inspector Errol Francis Deveyra uban nila ni SPO4 Daniel Tarucan, SPO2 Benjamin Sebellita, PO3 Ferdinand Pablo, PO3 Benedicto Lasque ug PO1 Jude Enemecio ang daling miresponde sa alarma.

Sa imbestigasyon nga gipahigayon ni Tarucan nasuta nga si Ludivina Emoricha, 48, residente sa maong barangay kinsa nangahoy maoy nakakaplag sa maong ulo.

Base sa kahimtang sa maong ulo, gituohang pipila na ka adlaw kining gilabay sa maong dapit tungod kay inanay na kining nadugta ug tungod usab niini naglisod na ang kapolisan sa pagtino kung iya ba kini sa babaye o sa lalaki.

Si Cabingatan mibutyag ngadto sa kapolisan nga niadtong unang semana sa Disyembre 2011 dihang nag-ayo sila sa tubo sa linya sa ilang tubig nga nahimutang diin makaplagi ang ulo nakasingo sila og dili maayong baho apan wala lang nila kini panumbalinga.

Hinuon sa pakisusi sa kapolisan walay residente diha sa dapit nga na-missing o nawagtang nga posibleng matuohan nga maoy tag-iya sa ulo.

Ang kapolisan nakig-ayuda sa Crime Scene Investigation (CSI) sa Cebu Provincial Police Office (CPPO) sa ilang gipahigayong imbestigasyon kabahin sa insidente.

Ang ulo gipaubos kini sa autopsy aron mailhan ang gender niini ug mapreserba ang dental features aron maoy basehan kung adunay moduol nga tagtungod.(/EIM)  (BANATNEWS)