5 right-hand drive nga sakyanan gisakmit

CEBU, Philippines - Lima ka mga right hand drive nga sakyanan ang nasakmit sa mga sakop sa Criminal Investigation and Detection Group (CIDG-7) sa usa ka bodega sa barangay Mactan, sa dakbayan sa Lapulapu niadtong Miyerkules sa hapon.

Gibanabanang mokan-tidad og dul-an usa ka milyon ka pesos ang nasakmit nga mga sakyanan gikan sa usa ka Pakistani national nga si Muhammad Irfan.

Si   Irfan maoy gitumbok nga tag-iya sa maong bodega apan wala madakpi sa kapulisan.

Ang mga sakop sa CIDG-7 gipangulohan ni Chief Inspector Fermin Armendarez mironda sa bodega pinasikad sa search warrant nga giisyu ni Regional Trial Court (RTC) Judge Marilyn Yap , executive Judge sa dakbayan sa Mandaue.

Nakuha nga mga sakyanan naglakip sa upat ka Honda Fit ug usa ka Mitsubishi Colt.

Si Sr. Supt. Jose Pante, hepe sa CIDG nagkanayon nga nakadawat sila og impormasyon kabahin sa usa ka bodega sa Lapulapu nga dunay mga right hand drive nga gipanag-iya ni Irfan.

Ang lima ka right hand drive giingong i-convert kini ngadto sa left-hand drive. Ang mga sakop sa Regional Intelligence Division (RID) ug Highway Patrol Group (HPG) maoy miabag sa maong operasyon sa CIDG-7.

Ang kapitan ug mga tanod sa naasoy’ng lugar maoy misaksi atol sa ronda sa kapulisan. Kini maoy ikaduhang higayon nga ang CIDG-7 nakasakmit og mga right-hand-drive vehicles ning tuiga.

Una niadtong bulan sa Hulyo, ang CIDG nakasakmit usab og mga sakyanan nga right-hand drive gikan sa usa ka bodega sa reclamation area.

Bisan tuod kun wala madakpi si Irfan ang kapulisan mopasaka gihapon og tukmang kaso batok kaniya nga kalapasan sa RA 8506. (BANATNEWS)