Cook sa dakong hotel nag-unay

CEBU, Philippines - Nagkaunay ang duha ka mga cook sa usa ka five star hotel sa Lapulapu diin usa kanila ang kritikal ang kahimtang human natigbasan sa Purok Chochay, sitio Humayhumay barangay Gun-ob dakbayan sa Lapulapu kagahapon sa kaadlawon.

Ang biktima mao si Petronilo Sacristan, 30, residente sa maong dapit, usa ka kusinero sa usa ka five star hotel sa Lapulapu ug ang gitumbok nga suspetsado mao ang iyang kauban sa trabaho nga si Adonis Garingo, 30, ug silingan sa biktima.

Sa imbestigasyon sa kapolisan nasuta nga mga alas 12:22 kagahapon sa kaadlawon nag-inom si Stanly Cabillo (silingan sa biktima) duol sa tugkaran nila ni Sacristan ug Garingo ug gumikan sa kasaba gibadlong kini ni Stephen Garingo (igsoon ni Adonis).

Ang maong pagpamadlong misantop kini sa panaglalis ug pagsinukmagay nila ni Stanly ug Stephen hinungdan nga miuwang si Sacristan.

Apan nagtuo si Adonis nga si Sacristan maoy nakaaway sa iyang igsuon hinungdan nga dali kining mikuha og pinote dayong tigbas sa ulo niini.

Si Sacristan gidala sa Lapulapu City Hospital samtang ang magsuong Garingo daling misibat, apan si Adonis nasikop ra usab sa kapolisan ug kasamtangang gibalhug sa buhatan sa kapolisan. (BANATNEWS)