Wanted sa Biliran nasikop dinhi
CEBU, Philippines - Human magtagotago sulod sa dugay nang panahon nadakpan ang ikawalo sa mga most wanted criminal sa Naval, Biliran dinhi sa dakbayan sa Sugbu sa mga sakop sa Criminal Investigation and Detection Group (CIDG) Central Visayas.
Ang gisikop subay sa warrant of arrest nga giisyu sa Regional Trial Court 8 sa Naval, Biliran sa kasong pagpayuhot og ginadiling drugas mao si Aljay Ray Bontes.
Si Sr. Supt. Jose Pante, hepe sa CIDG nga nahinabi sa mga tigbalita nga ang kapulisan sa Biliran nagpatabang kanila pag-monitor dinhi sa Sugbu sa pamasin nga makit-an ang suspek nga si Bontes.
Matud ni Pante ilahang nasigpatan si Bontes sa usa ka car wash diha sa Salinas Drive sa barangay Lahug hinungdan dali silang nangayo og kopya sa WOA sa kapulisan sa Biliran aron kini dakpon.
Matud ni Pante nga nakurat pa si Bontes dihang ilang giposasan ug ilaha kining gipasabot sa agiatubang niining kaso didto sa ilang lugar.
Ang suspek hugtanong mihimakak nga nalambigit siya sa pagpayuhot sa ilegal nga drugas sa ilang lugar ug natingala kining nganong aduna siya’y warrant.
Si Bontes ihatud unya didto sa Biliran aron ipresentar ngadto sa korte. Matud ni Pante daghan pang mga most wanted person dili lang sa Central Visayas nga naa dinhi sa Sugbu nagtagotago ug mao karun ilang prayoridad. (BANATNEWS)
- Latest
- Trending
