Model nga dalaga gilugos sa panday

CEBU, Philippines - Nakuha gyud ang pagkababaye sa usa ka kanhi call center agent ug usa na karon ka model sa iyang trabahoan human kini kamanga sa silingan niyang panday didto sa ilang balay sa barangay Pitogo, lungsod sa Consolacion sa miaging gabii.

Ang biktima ug ang suspek pulos gitago ang mga ngalan apan  molupyo ang duha sa maong lungsod.

Si PO3 Marjorie Paller sa Womens desk sa Consolacion Police mibutyag sa Banat News nga ang biktima nag- inusarang natulog sa ilang balay tungod kay atua man sa Luzon ang iyang ginikanan.

Wala kini makabantay nga misaka ang iyang silingan nga dali kaayong nakapatong kaniya nga wala nay hapin sa lawas.

Dihang misuway siya sa paglugnot, gition ang kutsilyo niini sa iyang liog busa wala na siya makalihok ug wala na siya kapangayo og panabang sa iyang mga silingan.

Busa milampos gyud ang suspek sa pagkuha sa iyang pagka-babaye.

Pagkahuman misibat dayun ang suspek nga nagbahad nga mobalik ug patyon kini kun motug-an sa kapolisan.

Apan kagahapon sa buntag, iya gyung gisumbong sa kapolisan ang maong hitabo.

Sa pagkakaron padayon pang gipangita sa kapolisan ang suspetsado.

Samtang sa laing bahin nadakpan sa kapolisan kagahapon ang usa ka amahan kinsa miunay og lugos sa 7 anyos niyang anak sa makadaghang higayon sa ilang    balay sa usa sa mga barangay sa dakbayan sa Bogo.

Ang biktima kinsa usa ka Grade 2 nga estudyante anaa na sa mga kamot sa DSWD human kini dad-a sa kapolisan ngadto sa Pink Room sa Vicente Sotto Memorial Medical Center sa dakbayan sa Sugbo.

Hinuon may kaso nang gipasaka ang kapolisan sa Bogo batok sa suspetsado kansang ngalan uban sa biktima pulos gitago sa kapolisan. (WC)(BANAT NEWS)