5 polis wa magsuot og uniform ipalabay

CEBU, Philippines - Lima ka mga pulis nga nasakpang wala magsuot sa kompletong uniporme atol sa ilang pag-duty atol sa pagpang-inspeksyon sa naghinapos nga bulan sa Oktubre ang gipaabot nga ilabay ngadto sa laing probinsya sa sunod semana.

Si Chief Supt. Marcelo Garbo pangulo sa kapulisan dinhi sa Central Visayas mibutyag nga ang lima iyang nasakpang wala mag-uniporme ug nagsul-ob og kalo atol sa iyang inspeksyon niadtong Oktubre 30, ug 31.

Matud ni Garbo dili na siya magkinahanglan pa og tubag gikan sa maong mga pulis kun unsay ilang rason nganong wala motuman sa iyang kamanduan sanglit sa wala pa ang pagtimaan sa adlaw sa mga Santos daan na siyang mipahibawo ngadto sa tanang city ug provincial directors nga pahibaw-on sa iyang kamanduan.

Matud ni Garbo karung sunod semana mahibaw-an na kung asa niya ipalabay ang maong mga pulis kay sa pagkakarun dili pa siya makaatubang niini tungod sa kalag-kalag. Lima palang ang gikatakdang ilabay sa laing probinsya ug posible pa kining madugangan unya kung duna pay laing mga pulis nga masakpan ni Garbo kun mopahigayon kini og surprise inspection ngadto sa tanang detachments, police stations ug headquarters.

Hinuon ang lima ka mga pulis gipugngan lang una ilang mga pangan kay wala paman sila makuhai sa ilang reaksyon kabahin niining pagpalabay nila ni Garbo karung sunod semana. (BANAT NEWS)