Managsuong wanted sa murder arestado

CEBU, Philippines - Nadakpan sa kapolisan ang managsuong pinangita tungod sa kasong murder sa mga sakop sa Presinto 2 sa Casuntingan Police Station sa dakbayan sa Mandaue.

Si PO2 Mareno Lufranco sa Investigation Detection and Management Bureau (IDMB) sa Mandaue City Police Office (MCPO) nga nahinabi sa Banat News miila sa duha nga mao sila si Jovannie Pigon Jumao-as, 31, ug Alberto Pigon Jumao-as, 26, pulos mga lumad nga taga lalawigan sa Masbate.

Ang duha nadakpan sa ilang gipuy-an sa sitio Barlaps, barangay Banilad sa dakbayan sa Mandaue ug maoy mga suspek sa pagpusil patay kang Exel Pacana nga taga barangay Banilad nga nahitabo niadtong Marso 28 niadtong tuig 2010.       

Matud pa ni Lufranco giila sa mga testigos ang managsoon nga maoy mipusil kanila niadtong Abril 2010 samtang sila padulong na pauli gikan sa disko.

Ang duha nawagtang sa ilang gipuy-an ug giingong namauli sa Masbate apan namalik ug nasigpatan sa mga sakop sa Barangay Intelligence Network (BIN) hinungdan sa ilang pagkadakop.

Ang duha adunay warrant of arrest nga giluwatan ni Judge Marilyn Yap sa RTC Branch 28. (BANATNEWS)