22 stalls sa T.Padilla Market gisirhan

CEBU, Philippines - Hingpit nga gisirhan kagahapon sa Cebu City Market Authority ang 22 ka mga tindahan sa T.Padilla gumikan kay wala kini maka-renew sa ilang business permits nga gipangunaya’g sira ni City Market Administrator Racquel Arce.

Kasagaran sa mga tindahan nga gipasirhan naglangkob sa karnehan, sari-sari store, karenderiya, bugasan ug uban pa.

Gipahibalo hinuon ni Arce dinhi sa Banat News nga walay komosyon nga nahitabo atol sa pagpanira sa mga tindahan sanglit hagbay ra nga nakadawat og notisya ang mga tag-iya sa nahisgutang mga negosyo.

Sumala pa niya nga kinahanglang moadto sa ilang buhatan ang mga naapektahang vendors aron maka-comply sila sa mga saktong rekisitos kung gusto nilang mobalik sa ilang mga puwesto.

Nagkanayon si Arce nga igo lang niya nga gibuhat ang iyang trabaho busa pahimangno niya sa mga negosyante nga motuman pud sa balaod partikular na sa pagkuha og business permit aron dili ma-problema ang ilang negosyo.

Duawon usab karon sa grupo ni Arce mao ang Ramos Public Market ug karon pa masayran kung pila ka tindahan ang masirhan sa maong merkado.  - BANAT NEWS