Mga residente sa San Vicente Ferrer naghugpong

CEBU, Philippines - Gipakita sa 200 ka pamilya nga nagpuyo sa sitio San Vicente sa barangay Tabok sa dakbayan sa Mandaue ang ilang panaghiusa niadtong miaging adlaw sa gipatawag nga tigom ni Tabok Barangay Kapitan Felix Suico pinaagi usab sa hingpit nga pag-umol sa ilang asosasyon sa urban poor nga gitawag og San Vicente Ferrer Tabok Mandaue City Homeowner Association.

Ang hingpit nga pag-umol sa maong asosasyon natigayon human masuta ni Suico nga silang mga residente sa sitio San Vicente walay rehistrong asosasyon sa Securities and Exchange Commission (SEC) ug Housing and Urban Development Office sa dakbayan sa Mandaue.

Usa ka eleksyon nga gipangunahan sa pagdumala ni Housing Urban Development Office (HUDO) officer-in-charge Noel Arong ang ilang napili nga presidente si Greg Rubio.

Kauban niya nga napili nga mga opisyal sa maong piniliay nga gipahigayon mao sila si Josefina Olivo nga maoy bise presidente, Maria Laelane Sacote, sekretarya, Josefina Ohagan, treasurer ug Josefina Balila isip auditor sa maong kahugpongan.

Dugang gipili sa maong election nga gipahigayon mao ang mga sakop sa board of directors nga naglakip kanila ni Demetrio Pestano, Marcial Deo, Jayson John Mapalad, Gerry Arnado, Marlon Mangubat, Cora Inso ug Rina de Leon.

Si Arong mipasabot nga ang pagtukod sa asosasyon pagpangandam sa tabang sa gobiyerno karong gihulga ang mga molupyo nga papahawaon sa usa ka Paz Lim nga miangkon nga tag-iya sa yuta nga ilang gipuy-an.

Matud pa ni Rubio nga dako kaayo ang responsibilidad nga iyang gisagubang sanglit magparehistro pa sila sa asosasyon samtang nagpaabot sa unsay dangatan sa bahad sa miangkon nga tag-iya sa maong luna nga ilang gipuy-an. ( EIM)   (BANAT NEWS)