Magtiayon nadisgrasya tungod sa iro

CEBU, Philippines - Kritikal ang usa ka ginang ug naangol usab ang bana niini human malamba ang ilang gisakyang motorsiklo dihang aksidenting nakaligis og iro nga mikalit og labang sa karsada sa national highway sa barangay Maslog siyudad sa Danao kagahapon sa alas 3:45 sa kaadlawon.

 Ang mga magtiayon nga naangol mao sila si Antonio Pepito, 53, ug asawa nga si Vivian Pepito, 53, molupyo sa barangay Yati lungsod sa Liloan.

Matud ni SPO1 Renante Manulat, traffic investigator sa Danao City Police Station dihang nahinabi sa Banat News ang magtiayon gikan sa lungsod sa Liloan ug paingon sa amihanang bahin sa Sugbo. Apan pag-abot niini sa maong lugar kalit nga milabang ang usa ka iro sa karsada ug tungod kay dunay gikusgon ang pagpadagan sa motorsiklo ug naapiki na sa pag-apply og brake nadasmagan nila ang iro.

Ang drayber sa motorsiklo nadala sa milupad nga motor samtang ang asawa maayong pagkabundak nga nag-una ang ulo sa sementado nga karsada ug ang iro nga ilang naligsan namatay usab tungod kay nasentro kini pagkaigo.

Ang mga tawo nga unang nakaresponde sa crime scene mao nay mitabang sa magtiayon ilabi na gyud sa asawa nga gihulagway nga wala nay panimuot ug nagkadugo ang ulo niini sa mga samad nga naangkon ang daling gihatod sa Danao City District Hospital kauban ang bana niining naangol usab.

Tungod sa kaseryuso sa ilang kahimtang gi-refer dayun kini sa mga doktor pagpa-transfer sa tambalanan dinhi sa dakbayan sa Sugbo alang sa dugang medikasyon.  - BANAT NEWS