10 kahigayon misuway og ikyas sa ASG

CEBU, Philippines - Kanapulo ka higayon nga misuway pag-eskapo si Engr. Virgilio Fernandez gikan sa mga kamot sa Abu Sayyaf Gang nga midagit kaniya sulod sa 16 ka adlaw.

Kini ang giasoy ni Fernandez ngadto kang Gob. Gwendolyn Garcia atol sa pagbisita niini sa Kapitolyo kagahapon aron pagpasalamat sa tabang aron makaadto ang iyang pamilya sa Basilan.

Matud pa ni Fernandez nga sa maong gidugayon, ka siyam usab siya gibalhin-balhin og nahimutangan panahon sa kagabhion samtang kanunay lang siyang pahigdaon sa adlawan. Unang gibungat ang P9.8 milyones nga ransom hangtud nga niabot kini og P30 milyones sulod sa lima ka adlaw.

Wala moangkon si Fernandez nga siya usa ka enhenyero aron dili mangayo og dako nga bayad ang mga midagit kaniya.

Matud pa ni Fernandez nga niabot gyud ang panahon nga mitahan na siya gumikan kay imposible gyud nga makakita ang iyang pamilya sa maong kantidad ug nagpaabot nalang kanus-a siya putlan sa ulo.

Niadtong Hunyo 19 sa kaadlawon, nakahigayon gyud pag-eskapo si Fernandez sa dihang iyang nailad sa pagpasakit-sakit ang mga nagbantay kaniya atol sa kusog kaayong bunok sa ulan.

Iyang gilikayan ang pagdangop og balay ug mga tawo nga iyang maagian sa kahadlok nga kaalyado sila sa mga bandido hangtud nga usa ka asset sa military ang nakabangal kaniya. - (BANAT NEWS)