Nagmotor naguyod sa trak patay

CEBU, Philippines - Patay ang usa ka lalaki human maligsi ug naguyod sa usa ka trak didto sa Salinas Drive, sa barangay Lahug, ning dakbayan sa Sugbo kagahapon sa udto.

Ang biktima mao si Alfabeto Roel Casas, 32, nga taga sitio Laguerta barangay Lahug, samtang ang drayber   sa trak nga nakaligis mao si Cuesta Rex Taghoy, 27, nga taga lungsod sa Tuburan.

Sa pakighinabi sa Banat News ni Manuel Tagaan, ang clerk sa City Traffic mibutyag nga ang biktima nagmaneho sa iyang motorsiklo nga adunay plakang 7399-GI samtang si Cuesta nagmaneho usab sa usa ka Isuzu Forward nga adunay plakang YAW-164.

Matud pa ni Tagaan nga pareho og gipadulngan ang duha apan pag-abot sa maong lugar giingong miliko sa tuong bahin ang trak nga wala makabantay sa   nagdagang motorsiklo sa biktima.

Hinungdan nga nasaghiran ang motor sa trak ug natumba unya ang biktima napasok ngadto sa ilawom sa trak dayon naguyod kini   sa gilay-ong 17. 50 metros nga maoy hinungdan sa iyang kamatayon.

Kasamtangang natanggong   ang drayber sa Isuzu Forward sa Cebu City Police Office samtang nagpaabot sa kasong isang-at batok kaniya. (WC) (BANAT NEWS)