Pamilya sa gikidnap sa ASG tabangan

CEBU, Philippines - Mitunol og ayuda ang kagamhanan sa lalawigan sa Sugbo ngadto sa pamilya sa Sugbuanon nga si Virgilio Fernandez nga gidagit sa gidudahang mga sakop sa Abu Sayyaf sa Basilan.

Ang asawa sa biktima nga si Shirley nangayo og tabang kang Gob. Gwendolyn Garcia alang sa kaluwasan sa ilang pagpuyo sa dakbayan sa Lamitan, Basilan samtang magpaabot sa kalamboan sa kondisyon sa iyang bana.

Usa ka adlaw human mipadayag si Garcia sa kaandam sa Kapitolyo sa paghatag og ayuda, ang asawa kauban sa tulo ka anak nakigkita personal kang Garcia.

Ang Kapitolyo ang miabaga sa plete sa eroplano sa pamilya ug may kwarta nga wala gibutyag ang kantidad aron magamit samtang sila mopuyo sa dapit.

Matud pa ni Garcia nga nakig-alayon sila sa kagamhanang probinsiyal sa Basilan aron usab matabangan sa panginahanglan ang pamilya. Si Garcia kanunay’ng nagsusi sa kalamboan sa kaso apan nagdumili siya sa pagbutyag sa mga sakop sa media.

Lakip sa mihatag og ayuda mao ang Police Regional Office-7 human usab hangyoa ni Garcia nga makig-alayon sa kapolisan sa Basilan alang sa seguridad sa pamilya ni Fernandez.  (BANATNEWS)