Pagbukas sa klase malinawon

CEBU, Philippines -  Gihulagway sa mga otoridad nga malinawon ang unang adlaw sa pagbukas sa klase sa elementarya ug sekundarya sa pampublikong tunghaan sa Central Visayas ilabina dinhi sa Sugbo kagahapon.

Si PRO-7 Chief Supt. Ager Ontog uban kang Sr. Supt. Melvin Ramon Buenafe hepe sa Cebu City Police Office (CCPO) mibisita sa mga tunghaan kagahapon sayo sa buntag.

Ang ilang giduaw mao ang City Central School, Tejero Elementary School, Florencio Urot National High School sa barangay Mabolo ug Zapatera Elementary School ning dakbayan sa Sugbo.

Si Ontog nga nahinabi sa mga tigbalita mibutyag nga 90 porsiyento sa iyang mga sakop gipakatap niya sa mga tunghaan kagahapon.

Hinuon walay nasugatang problema ang kapolisan ug malinawon ang kinatibuk-ang rehiyon ilabina dinhi sa dakbayan sa Sugbo.

Ang kapolisan mipahimangno sa mga ginikanan nga kinahanglang bantayan ang ilang mga anak ilabina sa pagpanggawas sa klase inig ka hapon aron masiguro nga luwas ang mga bata sa ilang pagpamauli.

Samtang nabantayan hinuon ni Buenafe nga walay magbantay nga mga tanod sa pedestrian lane tungod sa mga tulunghaan.

Tungod niini gitahasan ni Buenafe ang iyang mga sakop nga bantayan ang mga pedestrian lane inig ka buntag ingon man sa hapon atol sa pagpanggawas sa mga bata aron maoy mogiya paglabang sa karsada.

Si Chief Insp. Bonifacio Garciano, hepe sa Theft and Robbery Section (TRS) sa CCPO miingon nga sugod kagabii ang mga sakop sa Anti-Street Hoodlums Operating Team (A-Shot) molibot sa mga Night High School kay ilang gitutokan karon ang mga batan-on nga sakop sa gang.

Badlongon sa kapolisan ang mga batan-on nga magtapok-tapok duol sa tunghaan human sa ilang klase sa gabii kay sagad nga malambigit sa rambol o kaha pagpamusil mao ang mga miyembro sa gang.

Gibutyag usab ni Garciano nga wala silay na-monitor nga mga tulisan nga ania sa Sugbo gikan sa laing lugar.

Apan namatikdan nila ang paghugpa sa mga mangunguot dinhi nga gikan sa laing mga lugar.

Giawhag ni Garciano ang mga tinun-an nga dili mokompiyansa sa ilang kuwarta o kaha mo-withdraw sa ATM machine kay kini maoy sagad target sa mga mangunguot ug pag-apil og linya sa mga tinun-an nga mobayad sa ilang pagpa-enroll.

Samtang si Sr. Supt. Patrocinio Comendador hepe sa Cebu Provincial Police Office (CPPO) mibutyag sa mga tigbalita nga wala siya’y nadawat nga report bahin sa dautang panghitabo sa probinsya atol sa unang adlaw sa pagbukas sa klase kagahapon.

Si Comendador nagkanayon iyang gipaubos sa heightened alert status ang iyang mga sakop.

Matud niya nga   99 percent sa iyang mga sakop sa probinsya ug sa headquarter maoy iyang gipakatap sa mga tunghaan sayo kagahapon sa buntag.

Kagahapon sa buntag miadto si Comendador sa tunghaan sa Minglanilla, Talisay, ingon man sa dakbayan sa Danao diin kadtong mga dagkong pampublikong tunghaan maoy iyang gipabantayan ilabina sa pagpamauli sa mga bata inig ka hapon.

Matud ni Comendador nga duha ngadto sa tulo ka semana gikan kagahapon, ilang tutokan ang pagbantay sa hapon  inig panggawas   na sa mga tinun-an aron mamauli.

Sa bulan sa Hulyo mobisita siya sa mga tulunghaan sa probinsiya aron mopahigayon og lecture sa mga tinun-an unsaon nga malikay sila sa bisan unsang matang sa kriminalidad. (WC) (BANAT NEWS)