Tulis sa M. Lhuillier inside job?

CEBU, Philippines - Mikabat sa P5 milyones ang kantidad sa mga alahas ug salapi nga nasakiyo sa unom ka mga armadong mga tawo nga wala hiilhi kinsa mitulis sa M. Lhuillier Pawnshop sa Brgy. Pusok , ubos nga bahin sa 2nd Mactan Bridge sa dakbayan sa Lapulapu kagahapon sa alas 2:00 sa hapon nga gidudahang inside job.

Si Lapulapu City Police Office Director PSSupt. Anthony Obenza mibutyag sa Banat News ang mga biktima mao ang unom ka mga opisyal sa M.Lhuillier nga gikan sa dakbayan sa Ozamis ug Cagayan de Oro City uban sa taga Sugbo.

Matud pa ni Obenza nga mitugpa ang upat ka mga opisyal sa tugpahanan sa Mactan sa alas 2:00 sa hapon ug gisugat usab sila sa duha ka mga opisyal sa M Lhuillier nga taga dakbayan sa Sugbo.

Miingon si Obenza nga samtang nagsakay sila sa ilang service vehicle paingon sa dakbayan sa Sugbo, pag-abot sa tiilan sa 2nd Mactan bridge kalit kining gibabagan sa duha ka motorsiklo nga giluwanan og tag- tulo ka tawo matag usa, ug dungan sa pagtion sa ilang mga armas de fuego, mipahibawo usab nga tulis.

Wala makalihok ang mga biktima sulod sa ilang sakyanan, ilabi na dihang usa sa mga tulisan mibuak sa windshield sa ilang sakyanan nga maoy nakapabalaka kanila nga basin pamatyon sila.

Gumikan sa kahadlok, nakahigayon ang mga tulisan sa pagkuha sa dalang salapi sa mga biktima nga balor og P25 mil uban sa usa ka kahon sa mga alahas nga nagkantidad usab og P5 milyones.  - BANAT NEWS