Giduslak-duslak samtang natulog tipi
CEBU, Philippines - Nagbuy-od ug naligo sa iyang kaugalingong dugo ang usa ka lalaki human kini gisaka sa iyang panimalay ug gidunggab diha sa Lopez Jaena St. barangay Poblacion dakbayan sa Lapulapu kagahapon sa kaadlawon.
Ang biktima mao si Ian Clark Ravina, residente sa maong dapit ug usa ka parking attendant.
Base sa imbestigasyon ni SPO2 Ernesto Francisco sa Homicide Section sa kapolisan sa dakbayan sa Lapulapu nasuta nga mga alas 2:30 kagahapon sa kaadlawon napalgang patay si Ravina nga napuno sa dinunggaban ang kalawasan.
Usa ka Ernesto Maymay residente usab sa maong dapit mipadayag nga nakamata kini human siya makadungog og saba sa lawak sa biktima ug sa pagsusi pa niini naglunang na sa iyang kaugalingong dugo si Ravina.
Sayo pa niini miuli si Ravina nga hubog sa iyang panimalay ug midiretso sa iyang lawak.
Blangko pa hangtud ning pagsuwat sa balita kung kinsa ang responsable sa maong krimen ug sa motibo niini apan nagduda ang kapolisan nga dako ang kasuko sa mamumuno ngadto ni Ravina gumikan sa kadaghan sa mga samad dinunggaban nga nahiaguman niini.(EIM) (BANATNEWS)
- Latest
- Trending
