Gagmay'ng barko wa mobiyahe

CEBU, Philippines - Ang mga shipping company boluntaryong mikanselar sa ilang mga biyahe kagahapon tungod sa dautang panahon nga nagmugna sa dagkung mga bawod.

Si Captain Anelito Gabisan, Coast Guard District Central Eastern Visayas, deputy commander mibutyag nga pito ka mga barko ug upat ka mga bangka sa Sugbo ug laing tulo ka mga barko sa Dumaguete ang mikanselar sa ilang mga biyahe.

Hinuon giklaro ni Gabisan nga ang Coast Guard wala moluwat og advisory nga nagdili kanila sa pagbiyahe paglikay sa disgrasya apan pabilin ang ilang pahimangno sa mga gagmay’ng bangka nga di gyud molawig tungod sa kadagko sa bawod.

Sa laing bahin, si Nigel Paul Villarete, Mactan-Cebu International Airport Authority, General Manager nagkanayon nga walay gipangkanselar nga mga flight bisan niining dautang panahon gawas sa duha ka abyon nga na-delayed ang mga biyahe.

Si Ella Comahig sa Philippine Atmospheric Geophysical and Astronomical Services Administration (PAG-ASA) Mactan nagkanayon nga adunay low pressure area, nasigpatan kini kagahapon sa alas 2:00 sa hapon sa South East sa Zamboanga City.

Matud ni Comahig nga ang tibuok rehiyon makasinati og pagbunok pa gyud sa uwan ug dagkong bawod sa kadagatan tungod sa hanging amihan ug tail end sa cold front.

Si Comahig midugang nga base usab sa bana-bana sa panahon ang Sugbo makasinati og ma-arang-arang nga panahon karong Sabado ug Domingo. - Brenda Batuto ug ni Ryan Christopher Sorote sa The Freeman (BANAT NEWS)