Presyo sa serbisyo sa hotel ipatarong

CEBU, Philippines - Nagplano si Acting Mayor Joy Augustus Young   nga mopalabang og resolusyon aron mapugngan ang mga restaurant ug mga hotel sa paghatag og dili mao nga presyo sa ilang mga serbisyo sa ilang mga kustomer.

Gipasabot ni Young nga adunay mga establisemento nga nakahasol sa mga tawo ilabi na kun dili nila ilakip ang Value Added Tax (VAT) sa ilang menu ug unya na maningil niini inigbayad na sa customer.

Hinungdan nga daghang maglagot nga customer tungod niining maong kinaiya sa ubang mga hotel ug kan-anan nga dili magtarong sa paghatag og presyo sa ilang mga suki.

May mga customer nga magduda nga gibinuangan sila sa tagdumala sa maong mga kan-anan ug hotel gumikan sa dili paghatag sa tukmang presyo nga angay bayran nila.

“Mao man gyud na ang naandan nga pamaagi sa mga hotel ug restaurant, mas maayo nga ibutang nalang gyud nila ang final nga presyo sa ilang mga karatola. Dili baya tanang tawo maayo og Math,” matud pa ni Young.

Dugang pa niya nga may mga tindahan usab nga mobutang og service charge busa mihangyo siya nga ilakip nalang kini sa katibuk-ang presyo nga bayran sa customer aron dili maglibog ang maong mga tawo kanila.

“Mohangyo ta sa council nga mo-pass og resolusyon   aron mahunong na ang mao nga style,” sumala pa ni Young.

Nasayran nga dili malikayan nga malipat ang uban nga kustomer sa hotel ug restaurant   gumikan kay kasagaran niini mobase sa presyo nga ilang bayran sa ilang makita sa menu o sa karatola apan makurat nalang kay lahi nang ipabayad kanila tungod sa VAT. Dili hinuon tanang establisamento   ang nagbuhat niini gumikan kay may ubang mga food chain nga miplastar gyud sa tinuoray nilang presyo.   (BANAT NEWS)