Drug pusher tiklo

CEBU, Philippines - Nasikop ang usa ka drug pusher atol sa buy bust operation nga gilusad sa kapolisan sa dakbayan sa Bogo uban sa mga sakop sa Philippine Drug Enforcement Agency (PDEA)-7 didto sa barangay Gairan sa maong dakbayan sa miaging gabii.        

Ang nadakpan mao si Vicente Sayson, 39 , ulitawo apan   ang kapuyo niyang si Maribel Masong, hingkod mikabad og dagan hinungdan nga wala mahilakip sa pagkasikop.

Ang kapolisan sa Bogo gipangunahan ni Deputy chief Noli Cernio sa Bogo Police Station uban sa mga sakop sa PDEA-7 kinsa milihok dayon human masuta nga positibo sa negosyo nga pagpamaligya og shabu ang nahisgotang suspek.              

Ang suspetsado sayon ra kaayong naposasan human itunol niini ang 2 ka gagmay’ng pakite nga shabu ngadto sa polis nga nagpaka-aron ingnong buyer bugti sa minarkahang P300 isip bayad.

Lakip nga nasakmit sa kapolisan gikan sa suspetsado mao ang P600 nga gituohang halin sa ginadiling drugas.

Dihang mikagilkil na ang posas sa pulsohan sa suspetsado, nakaalinggat ang iyang kapuyo nga si Masong hinungdan nga nakakaratil kini og dagan pahilayo sa maong lugar.

Ang suspek nagtingkagol na karon sa karsel sa Bogo Police samtang gihikay na ang kasong ipasaka batok kaniya nga paglapas sa Akta Republika 9165 kon pagpamaligya ug paghupot og gidiling drugas. (BANAT NEWS)