Balay ampuanan ni soc gi-raid

CEBU, Philippines - Gironda sa kapolisan ang balay ampuanan ni Mayor Socrates Fernandez diha sa Vista Grande habig sa barangay Candulawan, dakbayan sa Talisay kagahapon ug nakuhaan sa kapolisan og mga drug paraphernalia.

Ang pagronda natigayon human ang kontrobersyal nga anak sa mayor nga si Joavan gipasanginlang namusil sa usa ka tindero tungod kay dugay kining nakatunol sa order niyang softdrinks niadtong Miyerkules sa 1:50 sa hapon diha sa Club House sa maong subdivision.

Ang mireklamo mao si Raymund Paran ,19, daling miikyas si Joavan ug giingong misulod sa balay ampuanan nga gipanag-iya sa amahan. Tungod niini mi -apply og search warrant diha ni Regional Trial Court (RTC) Judge Soliver Peras sa Branch 10 ang mga polis.

Base sa imbestigasyon sa kapolisan nga si Joavan sakay sa usa ka Kia Grand Sportage nga kolor puwa nagtangag sa plakang JCV-766 mihapit diha sa maong tindahan aron mopalit og softdrink apan tungod kay nagkaon pa si Paran wala kini dayon makatubag sa anak sa mayor.

Dihang migawas si Paran ug mitunol sa softdrinks giingong nasuko si Joavan ug sa dayon niyang pagbalik sa tindahan gitiunan siya niini og pusil ug gipabuthan dayong pahaguros sa iyang sakyanan nga wala makabayad.

Si Ederlina Anderson tag-iya sa Club House ug presidente sa homeowners sa subdivision pasado alas-2 sa hapon sa maong adlaw nanawag sa mga polis ug mi-report sa maong hitabo.

Usa ka hot pursuit operation ang gihimo sa kapolisan batok kang Joavan. Usa ka drayber sa habal-habal nga si Fernando De Guzman nga nahinabi sa mga tigbalita mibutyag nga nasugatan niya si Joavan nga adunay mga pangos ug walay pang-ibabaw nga sinina diha sa sitio Cabancalan barangay Bulacao, dakbayan sa Sugbo.

Matud ni De Guzman nga si Joavan misulti kaniya nga milayat kini diha sa kilid nga bahin sa Balay Alampo-an. Human niini gisugo siya ni Joavan pagkuha og taksi apan tungod sa kadugay siya nalay gipahatud niini kaniya paingon sa Mansueto Subdivision sa balay ni Joavan ug gitunolan siya og P120.

Mga alas 12:15 nasugdan ang pagsiksik sa Balay Alampo-an ug mga sakyanan diha sa sulod sa garahe sa grupo nila ni PO3 Mikie Espina ug PO1 Rosauro Pasumala atubangan sa upat ka kaubanan ni Joavan sa balay lakip na si Benedict Gabasa.

Sa wala pa sugdi ang pagsiksik, gipangbalit-ad sa mga polis ang ilang mga bulsa ug gihubo usab nila ang ilang sapatos ug mediyas aron ipakita nga wala silay bisan unsang gidala.

Human sa tulo ka oras nga pagsiksik nakuha gikan sa kwarto ni Joavan sa basement ang duha ka mga gamay’ng pakete nga dunay residue sa shabu, mga shabu paraphernalia ug piloka.

Si Supt. Henry Biñas hepe sa Talisay City Polic Station nagkanayon nga padayon ang ilang hot pursuit operation batok kang Joavan.

Si Paran nga nahinabi sa Banat News kagahapon nagkanayon nga dili siya moatras sa pagpasaka og kaso batok kang Joavan tungod kay gipaluyohan siya sa mga residente nga mibahad usab nga mohimo og legal nga lakang batok sa anak sa mayor.

Ang mayor sa report sa ABS-CBN Central Visayas mikutlo sa report sa DyAB nagkanayon nga katungod sa homeowners nga papahawaon si Joavan diha sa ilang lugar.

Ang Balay Alampo-an gi-cordon sa mga polis sa Talisay uban sa mga sakop sa Special Reaction Unit (SRU) niadtong Miyerkules pa sa hapon samtang nag-apply pa sila go search warrant.

Samtang sa iyang bahin, si Joavan kinsa mitawag dinhi sa Banat News kagahapon mihimakak sa mga pasangil batok kaniya ug mipasangil kining gidumtan lang siya sa amo ni Paran.

Matud pa ni Joavan nga dugay nang nagdumot kaniya si Ederlina Anderson, gani niadtong miaging eleksiyon mireklamo usab kini batok kaniya tungod sa kasaba sa iyang motor nga racer.

Gihulgaway ni Joavan si Paran nga tikasan. “Midako naman sad ang ulo ana, pwerting tikasana anang bataa,” ni Joavan pa ug midugang nga pagara-gara ra ang kang Paran tungod kay sakop kini og fraternity.

Si Joavan nakugang usab tungod sa giingong mga drug paraphernalia nga nakuha sa kapolisan sa Balay Alampo-an apan nagdumili paghatag og dugang pamahayag bahin niini.  (BANAT NEWS)