Patay'ng babaye nakit-an sa Dumanjug

CEBU, Philippines - Patay nang napalgan sa iyang kapuyo ang 27-anyos nga babaye niadtong Biyernes sa gabii diha sa sitio Mohon, barangay Cambuang, lungsod sa Dumanjug.

Ang biktima mao si Gemalin Balucos Celbano, residente sa maong dapit napalgan sa iyang kapuyo nga si Benjinito Ypanto, 47, nga nagbuy-od sa kasagbutan kilid sa punoan sa lubi nga dunay gilay-ong 19 metros gikan sa ilang balay.

Si Celbano dunay bun-og sa nawong ug daling gidala ngadto sa Barili District Hospital apan patay na kini. Nagduda ang kapuyo nga gipasipad-an ang biktima apan ang kapolisan nagsusi pa sa maong kaso. Sa laing bahin, nalandig sa tambalanan ang usa ka 28-anyos nga biyudo human kini dunggaba niadtong Biyernes sa gabii diha sa sitio Dungguan, barangay Bolinawan, dakbayan sa Carcar.

Ang biktima mao si Melvin Sumaldog, residente sa maong dapit kinsa nakaangkon og samad dinunggaban sa walang bahin sa iyang lawas daling gidala ngadto sa Carcar Emergency Hospital apan gibalhin kini ngadto sa Vicente Sotto Memorial Medical Center.

Ang suspetsado mao si Jaime Melendrez, nga residente usab sa sitio Dungguan ug daling miikyas human sa hitabo ug padayon pa kining gipangita sa mga polis. (BANAT NEWS)