Badlungon' gipusil pag-uli namatay

CEBU, Philippines - Gipusil patay ang usa ka lalaki nga gihulagway nga badlungon kaniadto kinsa gigukod sa wala mailhing lalaki samtang paingon nang mopauli sa balay sa iyang kapuyo sa miaging alas-11 pasado sa gabii diha sa sitio Ipil-Ipil sa barangay Mambaling ning siyudad.

Ang biktima giila sa Homicide Section nga mao si Lucky Martinez, nagpuyo diha sa sitio Tangke Mambaling ug nagtrabaho isip tigputos og lumpia diha sa Taboan Public Market.

Sa pasiunang imbestigasyon ni PO3 Ruth Violango ug mga kauban, naglakaw ang biktima nga paingon na pauli sa balay sa iyang kapuyo sa dihang gigukod kini sa usa ka lalaking nagtaptap sa nawong ug mipusil kaniya makadaghang higayon.

Ang mamumuno migukod sa biktima diha palang sa sitio Plastikan Duljo Fatima apan didto na nahagba sa sitio Ipil-Ipil si Martinez gumikan sa mga unom ka mga samad pinusilan sa ulo ug dughan nga nakaingon sa hinanali niining kamatayon.

Si Martinez gihulagway nga badlungon kaniadto apan karun nagbinuotan na siya ug nanarbaho isip tigputos og lumpia.

Ang Homicide Section misusi karun kun duna bay laing atraso ang biktima karun nga nagbinuotan na kini. (BANATNEWS)