Gipusil sa ilang tugkaran samdan

CEBU, Philippines - Naangol ang usa ka lalaki human kini pusila sa ala hiilhing tawo sa tugkaran sa ilang balay sa sitio Tabok, barangay Pit-os ning dakbayan sa Sugbo sa miaging gabii.

Ang biktima nga nailhang si Ronie Cal Alimorin, 45, may kapuyo nga taga Pit-os.

Sumala ni PO2 Michael Codaste sa Cebu City Police Office nga wala pa pusila, ang biktima nakig-inom   sa iyang mga higala dili kaayo layo sa ilang balay.

Sa dihang mipauli na kini wala kini makasulod sa ilang pinuy-anan kay giluthang kini sa wala hiilhing kriminal sa tugkaran sa ilang balay.

Si Remedios Damasole nga iyang kapuyo maoy midala kaniya ngadto sa Cebu City Medical Center aron matambalan ang duha ka samad sa abaga sa biktima.

Padayon pang gipangita sa kapolisan ang kriminal. (BANAT NEWS)