Mga obispo misaway kang Aquino

CEBU, Philippines - Gisaway sa mga obispo sa nagkadaiyang relihiyon sa nasud ang administrasyong Aquino gumikan kay nagsubay kini sa parehong dalan nga giagian kaniadto sa gisundan niining administrasyon.

Mao kini ang pamahayag sa mga obispo atol sa gipahigayong 21st Ecumenical Bishops Forum National Assembly nga gihimo diha sa Institute of Religion and Culture sa baranggay Guadalupe ning dakbayan.

Ang mga mitambong nga mga obispo nag-representar sa Romano Katoliko, United Church of Christ, Episcopal Church in the Philippines, Iglesia Filipina Independiente ug uban pa kagahapon pasado alas 11:30 sa buntag.

Ang maong asembliya gipahigayon aron mapadayag sa mga obispo sa gobiyerno ang mga yangungo sa mga militante ug ang ilang pagsaway sa nagpadayong extra-judicial killings sa ilang mga sakop. Si Bishop Julio Labayen sa Romano Katoliko miingon nga ang panagtigom usa ka pamaagi aron pahinumduman ang gobiyerno nga ang Pilipinas usa ka demokratikong nasud.

Lakip sa gipangayoan og katarungan sa mga obispo mao ang Morong 43 Health Workers, militarisasyon sa kabukiran, walay puas nga pagmina sa atong kabukiran ug ang gihulagway nga krimen sa Hacienda Luisita.

Ang obispo nga si Solito K. Toquero mitug-an nga nagpakita si Presidente Benigno Simeon ‘Noynoy’ Aquino III og timailhang ang gisubay niini karong dalan susama gihapon sa gihulipan niining administrasyon.

Ang administrasyong Arroyo naputos og pagsaway gikan sa militanteng pundok tungod sa kadaghan sa biktima sa extra-judicial killings, kurapsyon ug uban pa. Matud pa sa mga obispo nga wala sila makauyon sa pagpadagan ni Aquino sa renda sa kagamhanan sa nasud karon.  – BANAT NEWS