1 patay, 2 angol dasmag sa motor vs. de karga

CEBU, Philippines - Namatay ang usa ka tawo nga nag-angkas sa motorsiklo samtang naangol usab ang iyang duha ka kauban human kini madasmag sa usa ka trak de karga didto sa barangay Maricaban sa lungsod sa Sta. Fe sa isla sa Bantayan sa miaging buntag.

Ang namatay mao si Romeo Illustrisimo, 47, minyo, samtang ang naangol mao sila si Richard Almodin, hingkod, ug Tanny Ilosario, minyo, nga pulos taga Santa Fe.

Base sa imbestigasyon ni PO1 Ressan Moralde sa Santa Fe Police Station, nasayran nga si Almodin kinsa hubog sa bino niadtong tungora maoy nagmaneho sa motor, samtang si Illustrisimo ug Ilosario maoy iyang angkas..

Samtang kusog nga gipadagan niini ang motorisklo, nalipat siya gumikan sa bino nga iyang nainom kay nagtuo lang gihapon siya karsada ang de karga nga nag-parking sa daplin sa dalan.

Sa walay pupanaga girumbo niini ang maong sakyanan nga maoy nakapakurat kang   Renato Isgana, hingkod ang panuigon, minyo nga taga barangay Poblacion sa maong lungsod, nga maoy nagmaneho sa maong de karga.

Dugang pa ni PO1 Moralde nga nanglupad ang mga biktima, human sa maong pagdumbol ug sa pagtugpa niini napantok ang ilang mga ulo sa sementadong karsada.

Si Illustrisimo nga maoy nagrabihan, wala na makaagwanta sa grabing samad niya sa ulo nga maoy hinungdan sa hinanali niyang kamatayon.

Didto siya mabugtoi sa kinabuhi sulod sa Bantayan District Hospital diin tua pa usab tambali ang iyang mga kaubanan karon. (BANATNEWS)