Honorarium sa BHW patas-an

CEBU, Philippines - Gikalipay ni Mayor Michael Rama ang Senate Bill 1384 ni Senador Loren Legarda   nga nagsugyot nga patas-an og honorarium ang mga barangay health worker (BHW).

Ang laing balaodnon ni Legarda mao ang Senate Bill 1340 nga nagsugyot usab nga ipasakop sa National Health Insurance Program (NHIP) ang BHW.

Nagkanayon si Rama nga nasud-ong niya kung unsa ka mahinungdanon ang trabaho sa mga BHW , kinsa mas ilado pa kay sa mga opisyal sa barangay.

“Sila maoy pirmeng kaatubang sa mga tawo, unya kanunay ang ilang serbisyo busa uyon gyud ko nga patas-an ang honorarium sa mga BHW. Gani mas nakaila sila og maayo sa mga tawo sa barangay,” nagkanayon ang mayor.

Sumala pa ni Rama nga ang mga BHW maoy unang dangpanan sa publiko bahin sa suliran sa ilang panglawas bisan nag-antos sila sa gamay nga suweldo.

Matud pa sa mayor nga may mga higayon nga bisan sa lawom nga gabii pukawon pa sila sa katawhan nga may problema sa lawas ug andam sila sa pagtubag niini bisan lapoy kaayo ang ilang lawas.  – BANAT NEWS