Kampanya sa dengue gipakusgan sa Danao

CEBU, Philippines - Subsob nga kampanya batok sa dengue pormal nga ilusad sa kabarangayan sa siyudad sa Danao ug gisugdan na kini sugod kagahapon aron pagsumpo o pagpaminus sa nagsaka nga kaso sa dengue sa maong lugar.

Usa ka Non-Government Organization (NGO)s ang Danao Emergency League Transciever Amateur Incorporated (DELTA) maoy mangulo sa ipahigayong clean up drive inabagan sa local nga kagamhanan ug mga City health personnel sa barangay Looc.

Si Dr. Roque Noya kinsa maoy Vice President sa DELTA mipasabot nga ang barangay Looc maoy ilang gihimong pilot area tungod kay mao kini ang lugar nga adunay labing daghang kaso sa dengue sa tanang barangay sa Danao nga mitala na og 28 ka kaso ang tanan.

Matud ni Noya nga matag Sabado may nagkalain-laing barangay ang ilang limpiyohan sa mga hugaw nga basura ug mga lugar nga pundohan og tubig.

Ang barangay Poblacion adunay 23 ka kaso; Sabang, 11; Guinsay,10; ug Sandayong Sur, 8. Ang dakbayan sa Danao adunay 42 ka barangay.   (BANATNEWS)