Taga Talisay nananom og bakhaw
CEBU, Philippines - Ang lokal nga kagamhanan sa dakbayan sa Talisay, Department of Environment and Natural Resources (DENR), Philippine Navy, kapolisan ug mga residente ang nagkahiusa sa pagpahigayon og Mangrove Planting o pagpananom og Bakhaw didto sa barangay Dumlog, sa nahisgutang siyudad.
Si Joseph Ison, public information officer sa Philippine Navy mibutyag sa Banat News kagahapon nga mikabat ngadto sa 8,000 ka mga “propagules” o mga binhi nga Bakhaw ang ilang natanom sa 1000 metro kuwadrado nga luna nga kanhi kabakhawan sa barangay Dumlog ug ang DENR maoy midala sa maong mga binhi.
Matud ni Ison nga ang Bakhaw mabuhi sa lapokong lugar sa dagat ug mabantayan nga ang nahisgutang lugar nga gitamnan lapokon apan wala nay bisan usa ka Bakhaw ang mibarog karon.
Tumong sa siyudad sa pag-rehabilitate sa nahisgutang kanhi kabakhawan mao ang paghatag og kapasilongan sa mga isda diin anha usab sila mangitlog.
Gibutyag usab ni Ison nga aduna silay pundok nga mao ang Coastal Law Enforcement Alliance of Region (CLEAR)-7.
Ang CLEAR-7 gilangkuban sa Philippine Navy, DENR, Philippine National Police ug uban pang mga gaway sa armed forces ug ahensiyang hingtungdan diin ang tumong sa ilang kalihukan mao ang pagpreserba sa kalikopan.
Ang mga opisyal sa Philippine Navy nga sila si Commodore Armando Guzman, AFP, Captain Jose Renan Suarez, General Staff Course (GSC), PN, Deputy Commander Naval Force Central (NAVFORCEN), Capt. Renato Yongque, chief of staff NAVFORCEN ug Armando Egina, Pity Officer in Charge (POIC), NF7.
Si Provincial Police Office-7 director General Ager Ontog uban ni Senior Superintendent Anthony Obenza, hepe sa Police Community Relation (PCR) ug ang hepe sa Talisay City Police Station, Henry Biñas mitabang usab sa nahisgutang kalihukan. (BANATNEWS)
- Latest
- Trending
