Akrho gipatay sa 2 ka tawo

CEBU, Philippines - Usa ka gidudahang sakop sa Alpha Kappa Rho (AKRHO) gipusil patay sa duha ka wala hilhing kriminal didto sa barangay Upper Quiot, ning siyudad sa Sugbo sa miaging gabii.

Ang biktima giila sa kapulisan nga si Randel Abellana, 21, ulitawo, laborer ug molupyo sa maong dapit.

Matud ni PO2 Michael Codaste sa Homicide Section sa kapolisan sa dakbayan sa Sugbo nga ang biktima gikan pa sa ilang balay ug mibalik sa iyang gitrabahoan sa Inayawan.

Apan mihapit kini sa usa ka tindahan diin ang iyang mga higala nag-inom, unya ang duha ka wala hiilhing kriminal kalit lang miabot ug sa walay igong hinungdan gipusil sa makaduha ka higayon ang ulo sa biktima nga maoy nakaingon sa hinanaling kamatayon niini.

Matud ni Codaste ila pang susihon ang background sa biktima lakip na ang pagka miyembro niini sa Akrho kun kinsa ang gikabangi niini nga maoy malagmit mipatay kaniya. (BANATNEWS)