Lolo nga namatay nag-viagra?

CEBU, Philippines - Gituohan sa kapolisan nga migamit og Viagra o potency pills ang 60 anyos nga lolo kansang kinatawo napalgang nagbarog lang gihapon bisan patay na didto sa iyang balay sa barangay Obaob, lungsod sa Argao niadtong Lunes sa alas 9:00 sa buntag.

Ang biktima nga si Prudencio Catalan, 60 , ulitawo, giingong may kapuyo nga usa ka batan-ong babaye sa maong dapit.

Si PO2 Von Tecson sa Argao Police Station maoy mibutyag sa Banat News nga ang silingan sa biktima, maoy misugilon kanila nga si Catalan nagbuy-od sa sawog sa iyang balay nga wala nay kinabuhi ug walay sapot ang tibuok lawas nga nagtindog gihapon ang kinatawo.

Ang maong silingan nga wala magpaila giingong mangayo unta og tabako sa biktima dihang mitiurok kini sa kakurat pagkakita sa nahitabo ni Catalan.

Dihang gisusi sa kapolisan ug sa mga health personnel sa lungsod nasuta nga gawas sa nagtuy-od pa ang kinatawo, nagbuwa -buwa pa ang baba ug ilong niini.

Nasuta sa gihimong pagsukit-sukit sa kapolisan nga adunay kapuyong batan-ong babaye ang biktima apan wala na nila kini igkita.

Ang mga kabanay wala usab mopa-autopsy sa patay’ng lawas sa biktima pagtino kun wala ba kini patya og tuyo.

Apan tungod kay tawo lang wala ikalimod sa kapolisan sa lungsod ang ilang katahap   sa dakong kalagmitang migamit kini og Viagra o potency pills.

Sumala sa kapolisan sa Argao nga ang Viagra puwerting makapagana sa makatomar niini ug gituohan nilang maoy hinungdan sa kamatayon ni Catalan base sa katuskig sa kinatawo niini bisan wala na siyay kinabuhi. (BANAT)