Bata patay sa baha

CEBU, Philippines - Trese-anyos nga batang babaye, manghod niining 12 ug 8-anyos ug ang 55-anyos nilang lola naanod sa baha sa bukirang bahin sa sitio Cabu-an, barangay Cogon, lungsod sa Naga.

Naglutaw nang napalgan sa sitio Crusher, barangay Guindarohan, lungsod sa Minglanilla niadtong miaging hapon ang patay’ng lawas ni Kris Paran, 13.

Naluwas gikan sa baha ang iyang manghod nga si Renan, 12, ug ilang lola nga si Agripina Paran, 55. Apan padayong gipangita ang manghod sa magsuong Kris ug Renan nga mao ang 8-anyos nga si Renel.

Ang magsuon pulos residente sa West Poblacion, lungsod sa Naga.

Matud ni SPO1 Edward Velasco sa Minglanilla Police Station sa dihang nahinabi sa Banat News nga ang magsuon kauban sa ilang lola nga si Agripina sa dihang nanglabang sa sapa. 

Ang magsuong Kris, Renan ug Renel gikuha ni Agripina aron dad-on sa iyang balay sa sitio Cabu-an, barangay Cogon ug atol nga mibunok ang kusog kaayong ulan. Apan mipugos og tabok sa sapa ang apohan dala ang iyang mga apo tungod kay mao lamang kadto ang bugtong agianan paingon sa iyang pinuy-anan. Matud ni Agripina sa dihang gisukitsukit sa kapolisan nga kalit lang mikusog ang ‘pressure’ sa sapa tungod sa baha atol sa ilang pagtabok hinungdan nga wala na sila makakontrolar ug nabuhian niya ang mga bata ug gipang-anod sila sa bul-og sa tubig. Ang mga tawo sa lugar nga nakakita sa hitabo daling mitabang hinungdan nga naluwas si Agripina ingon man ang 12-anyos nga si Renan kinsa nasangit sa mga kahoy-kahoy sa sapa.

Samtang si Kris nakit-an kining wala nay panimuot paglabay sa 40 minutos human gianod paingon sa Guindarohan nga sakop sa lungsod sa Minglanilla. Gidali unta kini pagdala sa Minglanilla District Hospital, apan patay na kini sa paghiabot. Samtang sa paghimo ning balita, padayon pa nga gipangita sa kapolisan ang 8-anyos nga pabiling missing.

Si Cebu Provincial Police Office director Erson Digal miasoy sa Banat News nga iya nang gipahibalo si Gob. Gwendolyn Garcia sa trahedyang nahidangatan sa pamilyang Paran sa Naga, aron mapadad-an kini og hinabang gikan sa kagamhanan sa lalawigan sa Sugbo.

Gipahimangnoan ni Digal ang mga nanimuyo sa Talisay, Minglanilla ug Naga, ilabi na kadtong anaa magpuyo daplin sa kasapaan sa pagmabinantayon kanunay, karon nga kanunay ang pag-ulan-ulan.

Kun mahimo, matud ni Digal, biyaan nila ang ilang pinuy-anan daplin sa sapa aron dili madisgrasya. (BANATNEWS)