Kilat miigo sa presinto

CEBU, Philippines -  Nakugang ang mga nag-duty nga mga polis sa Daanbantayan Police Station tungod sa mipaka nga boto nga gituohang granada nga gilabay kanila, apan ang kilat diay nga miigo sa maong presinto sa kapolisan niadtong miaging alas 7 sa gabii.

Si PO1 George Banatasa miasoy sa Banat News nga wala hinuoy naigo sa kilat nga miigo sa presinto, apan maayong pagkaguba sa duha ka telebisyon, computer ug antenna sa radio transceiver.

Matud ni PO1 Banatasa nga wala karon silay komunikasyon sa Cebu Provincial Police Office (CPPO) tungod sa pagkadaot sa antenna sa radio transceiver.

Usa ka polis nga nag-duty nga si PO3 Pepito Layage, matud niya, hapit maigo sa maong kilat samtang naglingkod gawas sa presinto.

Si PO3 Layage matud pa nakalikay sa kilat sa dihang dali siyang nakaligid pag-igo sa kilat.

Sumala pa ni PO1 Banatasa nga kalit lang mipaka ang kusog nga boto sulod mismo sa presinto hinungdan nga nagtuo silang gi-atake sila og mga dautang elemento ug gilabay og granada.

Apan sa dihang nakita sa kapolisan ang telebisyon nga naguba, wala na sila magduhaduha nga kilat maoy miigo sa ilang buhatan.

Si PO1 Banatasa miingon nga ang telebisyon sa presinto ug sa opisina sa ilang hepe nga si Chief Insp. Laurel Almerante mibuto gyud sa pag-igo sa kilat. Ang computer nga gigamit sa mga polis paghimo og report naguba usab.

Naigo usab ang semento diin nahimutang ang gripo sa tubig sa presinto hinungdan sa pagkabungkag niini ug nagsige na hinuon og agas ang tubig.

Si PO1 Banatasa nagkanayon nga mikabat og P90 mil ang danyos nga gibilin sa pagkaigo sa kilat niadtong Martes kanus-a kusog ang pag-ulan-ulan sa maong lungsod.

Mananagat nakuhaan dinamita

Usa ka mananagat nakuhaan og dinamita ug uban pang kagamitan alang sa ilegal nga panagat sa barangay Marigondon, dakbayan sa Lapulapu sa milabay’ng hapon.

Ang mananagat nga nasikop mao si Romeo Artajo, 38, minyo ug residente sa sitio Ylaya, barangay Marigondon, dakbayan sa Lapulapu.

Si Artajo naaktuhan sa mga sakop sa Tourist Police Unit uban sa deputy chief nga si SPO4 Mario Poblete nga ilegal nga nanagat atol sa ilang pagpatrolya sa kadagatan sa Marigondon.

Matud pa ni SPO4 Poblete nga usa ka impormasyon ang ilang nadawat nga adunay nalambigit sa ilegal nga pagpanagat sa maong dapit gamit ang dinamita ug gagmay’ng matang sa pukot.

Sa pagresponde sa kapolisan mga alas 5:30 sa milabay’ng hapon, ilang nakita si Artajo nga luwan sa iyang pumpboat diin adunay kadudahang nilihukan hinungdan nga ila kining giduol. Atol sa paghiling sa pumpboat ni Artajo, nakuha ang pukot nga gagmay’ng mata, usa ka botelyang dunay sulod nga eksplosibo, dinamita, blasting caps ug fuse lakip na ang duha ka kilong isda nga gituhoang nakuha gikan sa ilegal nga panagat.

Gidala si Artajo sa buhatan sa kapolisan ug kasamtangang gitangGong.

Matud pa ni SPO4 Poblete nga si Artajo mag-atubang og kasong kalapasan sa RA 8550 gumikan sa mga ebidensiya. - Bong Soriano (BANAT NEWS)