Noval di mopa-contempt ni Quiño

CEBU, Philippines - Ang caretaker sa lungsod sa Compostela ug DILG-7 regional director Pedro Noval nagdumili sa pagpakita og interes sa pagpasaka og kaso batok kang mayor-elect Joel Quiño tungod sa pagdumili sa pagtahod sa kamanduan sa Comelec Manila nga nagsuspenso sa proklamasyon niini.

Kini bisan pa man og hingpit nang nakadawat si Noval og rekomendasyon sa Comelec Manila nga mahimong ma-contempt of court si Quiño tungod sa pagpadayon sa paglingkod isip mayor bisan pa man og ang DILG Manila mitudlo na kang Noval nga maoy acting mayor.

Sumala pa ni Noval nga buot siyang magpabiling neutral sa duha ka habig tali nila ni Quiño ug sa kanhi mayor Gilbert Wagas.

Iyang gitataw nga si Wagas maoy mas angayan nga mopasaka sa maong kaso sa korte o ba kaha sa Comelec aron ma-contempt si Quiño.

Si Quiño gikatahong nagpadayon sa paglingkod sa iyang katungdanan isip mayor pinaagi sa pag-okupar sa legislative building ug gikatahong nagpahigayon pa og sesyon bisan og natudlong caretaker mayor si Noval.

Niadtong milabay’ng adlaw gi-pullout na sa Cebu Provincial Police Office ang duha ka platoon sa Regional Mobile Group human giingong mibiya na sa legislative building si Quiño.

Samtang gitumbok ni Noval nga dili lamang sa problema sa bayrunon sa kuryente ug sa pagkolekta sa mga basura, ang iyang atimanon kondili apil na usab ang problemang suplay sa mga tambal.

Matud pa ni Noval nga ang municipal health officer sa lungsod mipahibawong nahurot na ang tambal nga ipang-apud-apod sa mga pasyente sa municipal health office ug ngadto sa mga kabarangayan ug wala na makakuha og dugang supply sa mga tambal tungod sa politikanhong panagsungi sa dagkong mga opisyales sa lungsod nga sila si kanhi mayor Ritchie Wagas ug mayor elect Joel Quiño.

Hinuon gitataw ni Noval nga iya nang gimanduan ang municipal health officer nga mopreparar og request sa tambal ngadto sa Kapitolyo aron iya dayon kining mapadangat ngadto kang Gob. Gwendolyn Garcia karong sunod nga semana.

Nasayran nga atol sa pagpanumpa ni Noval isip caretaker sa lungsod sa Compostela sa buhatan sa gobernador gipasaligan siya niini tabangan sa Kapitolyo sa mga gikinahanglanon ni Noval aron maserbisyohan ang mga molupyo sa nahisgutang lungsod.   (BANATNEWS)