Kawatan nakatulog nasikop

CEBU, Philippines - Usa ka suspetsadong kawatan og manok kinsa gikapoy ug nakatulog sa payag human mangawat, nadakpan sa mga tanod didto sa   sitio Kiw-kiw, barangay Pitalo, lungsod sa San Fernando sa miaging kaadlawon.

Siya mao si Antonio Lawas, 31, ug si Junrey Baculi, 28, usa sa duha ka magsoon niyang kauban sa pagpangawat maoy kauban niya karong napaslak sa prisohan   sa San Fernando Police Station.

Samtang si Carlito Baculi, 35, kinsa igsoon ni Junrey, nakaikyas ug wala pa hidakpi sa kapolisan.

Ang biktima nga gikawatan nila og mga hiniktang igtatari mao si Rusco Noel, 49, silingan ra usab sa mga suspetsado.

Si PO1 Lauro Laurel ang imbestigador sa nahisgutang hitabo mibutyag sa Banat News nga unom unta ka mga imported nga fighting cock nga nagkantidad ang matag usa og P8,000 ang nakawat sa mga suspetsado apan nabantayan kini sa handler.

Si Preme Parba kinsa maoy handler sa mga manok maoy nakakita sa tulo ka suspetsadong misulod sa compound nga nahimutangan sa mga manok.

Sa iyang kahadlok mitawag siya sa tag-iya ug nangayo og panabang.

Unya si Noel nanawag usab dayon og mga tanod ug sa pag-adto niya sa iyang manokan, mikaratel dayon og panagan ang mga kawatan apan si Junrey kinsa maoy nagdala sa sako nga gisudlan sa mga manok nagunitan niya.

Nabawi niya ang lima ka mga manok apan ang usa niini namatay sa sulod sa sako, samtang ang laing usa ka manok nadala gyud ni Carlito kinsa nakaikyas gumikan sa kakusog nga mikaratel og dagan niini.

Si Lawas nasikop niana nang pagka-alas 5:00 sa buntag kay nakatulog kini sa usa ka payag dili halayo sa manokan ug didto giposasan siya sa mga tanod.

Si Laurel midugang nga si Carlito ila karong gipapanid-an sa kapolisan sa barangay Pardo, dakbayan sa Sugbo kay gituohan nilang miuli kini sa ilang balay sa maong lugar diin kini magpuyo human maminyo og taga Pardo.

Matud pa ni Laurel nga si Carlito kinsa lumad nga taga Kiw-kiw ilado kaayo kining kawatan og manok sa maong dapit. -  BANAT NEWS