Joavan di mapugos pa-rehab kun...

CEBU, Philippines - Gipadayag ni kanhi Dangerous Drugs Board (DDB) Undersecretary Paul Clarence Oaminal nga walay mahimo bisan ang gobyerno pagpa-rehab sa kontrobersyal nga sinagop ni Talisay City Mayor Socrates Fernandez kun dili mokooperar ang mga ginikanan niini.

Mihatag og katin-awan si Oaminal nunot sa nagkalapad nga panawagan karun ilabi na sa mga molupyo sa dakbayan sa Talisay nga ipa-rehab si Joavan aron mohunong na ang pagpabadlong niini human niadto lang milabay’ng mga adlaw subli na usab kining nabutang sa kontrobersya sa dihang gipasanginlan nga nanghulga sa usa ka security guard sa usa ka subdivision sa Talisay.

Si Oaminal nga maoy nangusog og aktibo kaayo sa pagpatuman og kampanya batok sa gidiling drugas mibasol hinuon sa pipila ka probisyon sa atong balaod karon nga naghatag og kalisdanan ilabi na ang lakang sa pagpa rehab og mga gidudahang nagumon na sa pagbisyo og gidiling drugas.

Gitumbok ni Oaminal ang gipakanaog nga desisyon sa Korte Suprema niadtong Nobyembre 3, 2008 naghulagway nga ‘unconstitutional’ ang pagpaubos og drug test niadtong mga suspetsado nga madakpan sa mga kaso nga duna lay silot nga pagkabilanggo sa sobra unom ka tuig.

Matud ni Oaminal mapaubos lang si Joavan sa “involuntary rehabilitation” kun maatol nga madakpan kini og illegal drugs possession.

Tungod niini gibutyag ni Oaminal nga mapaubos lang sa pagpa-rehab si Joavan kun mokooperar ang iyang amahan nga mayor.

Si Joavan makadaghan na kining higayon nga gireklamo og pagpangabuso sa nagkalainlaing dapit sa Talisay apan kanunay usab kining ma-areglo sa iyang amahan nga mayor hinungdan daghan sa mga kaso niini ang wala molampos sa korte. – BANAT NEWS