Lolipop mokooperar sa liderato ni Jonas

CEBU, Philippines - Andam si Emarie “Lolipop” Ouano-Dizon, bag-ong napiling konsehal sa dakbayan sa Mandaue nga mokooperar sa administrasyon ni Mayor Jonas Cortes kinsa gisublian niadtong Mayo 10 nga eleksiyon nga miparot ni Kongresista Nerissa Soon-Ruiz.

Matud pa ni Lolipop bisan anaa sa oposisyon uban ni Editha Cabahug andam siya nga mosuporta sa mga programa ni Cortes.

Si Lolipop mipadayag nga ang iyang pagdagan sa politika alang sa pagserbisyo sa katawhan ug dili pagpasigarbo sa kaugalingon.

Subay niini, gipasalamatan ni Lolipop ang mga Mandauehanon sa paghatag kaniya og higayon nga makaserbsiyo ngadto kanila isip usa ka konsehal nga magdala sa ilang tingog ngadto sa hawanan sa konseho.

Kahinumduman nga si Lolipop ug si Cabahug lamang ang nakalusot sa kampo sa Nacionalista party nga gipangulohan ni Soon-Ruiz sa milabay’ng piniliay.

Sa milabay’ng hapon, pormal nang giproklamar ang mga kandidato sa kampo ni Cortes sa Liberal party uban sa iyang bise mayor nga si Glenn Bercede ug mga konsehal.  – BANAT NEWS