Pink Room sa VSMMC palapdan

CEBU, Philippines - Suportado ni kanhi Undersecretary Paul Clarence Oaminal sa Dangerous Drugs Board (DDB) ang tinguha nga palapdan ang women and children crisis center kon pink room diha sa Vicente Sotto Memorial Hospital (VSMMC) ngadto sa ubang mga dapit dinhi sa nasud.

Matud ni Oaminal ang pink room maoy dangpanan sa mga biktima sa pagpangabuso, sama sa pagpanglugos, physical ug psychological abuse ug mopa-angay usab ang maong tambalanan sa psychological ug medico legal assistance sa mga biktima.

Gisaysay ni Oaminal nga si kanhi DDB chairman Vicente Sotto III maoy mipalanog sa tinguha niya matukod usab kini sa ubang mga dapit dinhi sa nasud ilabina kun mahibalik siya sa senado.

Ang pink room sa VSMMC natukod niadtong 1999 ubos sa paningkamot ni Sotto dihang diha pa siya sa senado.

Gipasabot ni Oaminal ang kamahinungdanon sa pagbutang og women and children crisis center sa nagkalain- laing dapit dinhi sa nasud tungod kay sagad sa mga biktima sa pagpangabuso mga babaye, asawa, mga kabataan ug uban pa nga angay panalipdan ang katungod.

Ang mga lugar nga gihulagway ni Oaminal nga angay butangan og women and children crisis center mao ang Cagayan De Oro City alang sa region-10, Bacolod City alang sa region-6 ug Davao City alang sa region 11.

Si Sotto mibisita sa VSMMC ug nakita niini ang maayong pasilidad sa pink room niadtong Domingo atol sa paghandom sa ika-133 nga birth anniversary ni kanhi senador Don Vicente Yap Sotto nga iyang apohan. (BANATNEWS)