Soco negosyante maoy rumbo

CEBU, Philippines - Isip usa ka negosyante sa tinuod nga kinabuhi, si Glenn Soco, kinsa mikandidato pagka-bise gobernador sa lalawigan sa Sugbo, walay laing gidamgo kundi ang pagtabang sa tanang mga negosyante kun makadaog siya karong piniliay sa Mayo 10.

Matud pa ni Soco nga nasayran niya nga daghang negosyante nga nag-uylahot sa kalisod sa nagkalainlaing suok ning lalawigan.

Busa inig-lingkod niya sa pagka-bise gobernador suroyon niya ang tanang kabarangayan sa lalawigan ug ipatawag ang tanang mga negosyante aron iyang sutaon kun kinsa kadtong angayan niyang tabangan.

Kini tungod kay dako kaayo og ikatabang ang mga negosyante bahin sa suliran sa pangempliyo nga maoy giatubang karon sa kadaghanan.

Usa sa gihimong sanglitanan ni Soco mao ang negosyante og sapatos sa dakbayan sa Carcar diin may mga malampuson ug aduna usay gidimalas,

Misaad si Soco nga anhi niya palihoka ang iyang papel tungod kay mao kini iyang tumong nga makatabang sa tanang mga negosyante, dili lamang sa taga Carcar kundi sa tanang atua sa barangay ug kalungsoran sa tibuok lalawigan sa Sugbo.   (BANATNEWS)