Kadaugan sa Mactan gisaway

CEBU, Philippines - Nawad-an na og bili ang kasaulogan sa Kadaugan sa Mactan nga kanhi ‘Bahug-bahog sa Mactan’ gumikan sa mga nagdala sa papel ni Datu Lapulapu, Magellan ug Reyna Bulakna.

Kini ang pamahayag ni David Odilao Jr. ang amahan ug founder sa maong kalihukan nga iyang gisugdan niadtong Abril 27, 1979 ang unang re-enactment sa makasay-sayanong pakigbatok ni Datu Lapulapu ngadto ni Ferdinand Magellan sa Mactan.

Matud pa ni Odilao nawagtang na ang espirito sa “historical ug cultural” nga talan-awon sa maong re-enactment gumikan kay gisagulan na kini og pangwarta ug ang mga nagdala sa karakter gigastuhan na og dako tungod kay mga artista naman.

Gisaway ni Odilao ang balor 1.7 milyones ka pesos nga gahin sa Lapulapu City Tourism Commission, dihang gisugdan ang “Bahog-bahog” mga lumad nga Sugbuanon ang ilang gipanguhang modala sa mga papel ni Datu Lapulapu, Magellan ug Reyna Bulakna ug isip halad nila ngadto sa unang bayani sa nasud.

Apan si Ahmed Cuizon ang usa sa mga Commissioner sa Lapulapu Tourism, Cultural and Historical Affairs mipasabot sa Banat News nga dihang “Bahug-bahog sa Mactan” pa ang titulo niini, menus kaayo ang nanan-aw apan dihang gihimo kining “Kadaugan sa Mactan” sulod sa walo na ka tuig midagsang ang turista.

Sumala pa ni Cuizon nga dako og respeto kang Odilao ang commission apan sa nagkamodernong panahon kinahanglang aduna usab kausaban nga himuon.

Ang unang re-enactment sa “Bahug-bahug sa Mactan” nagsugod niadtong tuig 1979 nga gidumala ni Odilao ubos sa Ministry of Youth and Sports Development (MYSD) sa kanhing administrasyon ni Mayor Maximo Patalingjug.

Atol sa unang re-enactment ang midala sa papel ni Datu Lapulapu mao si Bert Alpasa ug sa papel ni Ferdinand Magellan mao si Danny Wenikee ang kanhi Regional Manager sa Metro Drugs diin gilangkoban sa 60 ka mga warriors nga sakop sa Doce Pares ni Grandmaster Ciriaco ‘Cacoy’ Cañete.   (BANATNEWS)