C-Cimpel List of Voters naa na sa Cathedral

CEBU, Philippines - Nagsugod na ang Cebu Metropolitan Cathedral sa pagpahibalo sa publiko asa makita ang ilang mga pangalan sa mga presinto sa adlaw sa eleksyon karong Mayo pinaagi sa Cebu-Citizens Involvement and Maturation for People's Empowerment and Liberation diha sa gawas sa cathedral.

Nagsugod kini niadto pang milabay’ng Domingo ug matapos hangtud sa katapusang Domingo sa dili pa ang eleksyon Mayo 10. Dinhi makit-an sa mga botante ang ilang mga pangalan kun asang presinto sila mobotar.

Si Fr. Sherwin Leo Ferrater, parochial vicar sa cathedral sa pakighinabi sa Banat News nagkanayon nga tumong niini ang pagtabang sa mga botante sa unom ka barangay ilawom sa ilang parokya nga matultulan sa sayo pa ang ilang mga presinto.

Matud pang Ferrater sagad sa mga botante adto na maghuot atol na sa eleksyon ug gumikan sa kadaghan sa mga tawo malangay na hinuon ug magkapuliki ang ilang mga volunteers sa pag-atiman kanila.

Target sa C-Cimpel nga katunga sa gidaghanon sa mga botante sa unom ka barangay ang makahibalo nang daan sa presinto asa sila mobotar aron sa ingon dili na magpunsisok sa Mayo 10.

Ang mga botante gikan sa barangay Pari-an, Tinago, San Roque, Sto. Niño, T. Padilla ug Tejero mahimong motan-aw sa listahan sa C-Cimpel, samtang kadtong mga pangalang wala sa listahan tambagan nga mosusi ngadto sa Comelec aron masigurong makaapil gyud sila sa eleksyon.

“Mentras sayo pa mahibaw-an dayon nila kun naapil ba sila sa list of voters kay kun wala ma-recheck nila dayon sa Comelec,” matud pang Ferrater kansang listahan sa mga botante gihatag gikan sa Comelec.

Gawas sa maong kalihukan, ang cathedral nagpahigayon sa ilang voters education kagahapon ug karong sunod Domingo sa hapon nga molanat og lima ka oras.

Ang C-Cimpel sa cathedral adunay 98 ka mga volunteers ug gipaabot nga pagamyan pa kini aron ang uban ilabi na niadtong edaran na ug dili na makasugakod himuong prayer warriors aron pag-ampo alang sa malinawong piniliay. – BANAT NEWS