Managsuon gipamusil angol

CEBU, Philippines - Naangol ang duha ka managsuon human kini pamusila sa wala hiilhing mamumuno didto sa sitio Romblon, barangay Inayawan, dakbayan sa Sugbo sa miaging adlaw.

Ang mga biktima giila nga sila si Efren Dacillo, 20, ug ang iyang maguwang nga si Elwood Dacillo, 27, pulos molupyo sa maong dapit.

Nasayran gikan sa kapolisan nga sa wala pa ang pagpamusil ang mga biktima nanglakaw kay mamalit og sigarilyo, dihang kalit silang gibabagan sa usa ka grupo sa mga tawong armado nga wala nila hiilhi.

Sugo sa maayong pamatasan, nangayo sila og maayong gabii, apan imbis motubag og tinarong, bala na hinuon   sa armas ang gipataroy sa kalawasan sa mga biktima.

Unang nahagba si Efren ug dihang misuway og sukol si Elwood, siya na usab ang gipusil.

Dihang nakita sa grupo nga pulos na naligid sa yuta ang mga biktima misutoy dayon sila og panagan pahilayo sa maong lugar.

Pulos samdan ang duha ka biktima sa tiyan ug dali kining gihatod ngadto sa Cebu City Medical Center, samtang ang mga Kriminal gipangita pa karon sa kapolisan human kinimanibat human makapusil.   (BANATNEWS)