Polis di pasul-ubo'g T-shirt sa kandidato

CEBU, Philippines - Si Provincial Police Director Erson Digal, hepe sa Cebu Provincial Police Office mipasidaan sa kapolisan sa dili na pagsul-ob og mga t-shirt nga iya ni bisan kinsang politiko karong nagsingabot na ang election.

Gawas sa t-shirt, gidid-an usab ang kapolisan sa pag-papilit og sticker sa ilang mga sakyanan nga iya sa usa ka kandidato o kaha sa partidong politikanhon.

Sa interview nga gihimo sa Banat News, gibutyag ni Digal nga ang maong pagdili nga iyang gihimo ngadto sa tanang polis sa lalawigan maoy paglikay nga kadudahan silang nag-apil-apil sa pangampanya sa mga kandidato alang sa nagsingabot nga piniliay sa Mayo 10, 2010.

Matud pa ni Digal nga gisubli-subli niya ang maong pasidaan nga dli gyud mag-apil-apil sa mga kalihokan sa kandidato karong panahona kay magkahulogan kini nga ikatangtang sa usa ka polis gikan sa serbisyo.

Ang kahigpit sa maong balaud dugay nang gipatuman sa kapolisan sa tibuok nasud aron kalikayan ang pagkadaut sa dungog sa katibuk-ang puwersa sa Philippine National Police (PNP).

Hinuon miingon si Digal nga mahimong ang polis magsul-ob og t-shirt nga susama og kolor sa mga gipanul-ob sa mga politiko isip opisyal nga uniporme sa partido ilabi na sa ilang pangampanya, apan mas maayong likayan nalang kini sa polis, matud pa niya.

Midugang si Digal nga iya usab nga gidid-an ang mga polis sa pagdawat sa mga hinatag nga t-shirt sa kandidato kay basin makalimot sila ug ikasul-ob kini sa ilang balay samtang wala sila’y duty ug kadudahan sila sa katawhan nga supporter o kaha miindorso sa tag-iya sa t-shirt nga ilang gisul-ob.

Gawas sa t-shirt higpit usab nga gidid-an ang kapolisan sa pagpapilit og sticker sa ilang sakyanan nga gikan sa usa ka kandidato o kaha sa partido aron dili katahapan ang usa ka polis nga namolitika na ug sa samang higayon nagserbisyo gihapon isip polis. – BANAT NEWS