Giluba sa bayaw angol

CEBU, Philippines - Nabulit sa mga samad dinunggaban ang usa ka tawo dihang giunay kini og luba sa iyang bayaw didto sa Sitio Paradise 3, Barangay Kinasang-an, dakbayan sa Sugbo sa miaging gabii. Ang biktima mao si Wilfredo Gasta alyas Botoy, 28, minyo nga taga Paradise, samtang ang suspetsado mao ra usab ang iyang bayaw nga si Jeffrey Villamor, 40, ulitawo nga kaipon niya pagpuyo.

Sumala sa kapolisan ang biktima mao pay pag-abot sa ilang balay ug gisugat kini og singhag sa suspetsado.

Unya samtang naghangos pa gikan sa lakaw, gibadlong sa biktima ang suspetsado nga dili lang pasabaon kay maikog sila sa silingan kay lawom nang gabii.

Apan inay mohunong sa pagyawyaw, milanit hinuon sa iyang kutsilyo ug dayon gihansak kini ngadto sa biktima.

Ang biktima nga walay panagang nabulit sa mga samad ang lawas ug na libre siya kay nakadagan siya pahilayo sa ilang balay ug nagpakitabang sa iyang amigo.

Gihatod dayon siya ngadto sa Cebu City Medical Center samtang ang suspetsado nagkagulkol na karon sa prisohan sa kapolisan sa Pardo Police Station human kini hidakpi. – BANAT NEWS