Katarong, pagka-matinud-anon maoy mensahe ni Vidal

CEBU, Philippines - Pag-usab sa kaugalingon ug paglikay paghimo og dautan sa isig ka tawo ug ipatigbabaw ang katarong ug pagkamatinud-anon sa kaugalingon, kini maoy pahimangno sa Arsobispo sa Sugbo Ricardo Cardinal Vidal atol sa pagpahigayon sa Siyete Palabras sa Cebu Metropolitan Cathedral niadtong Biyernes Santo.

“Tarungon ta ang hiwi natong dalan, ayuhon ta ang mga dautan natong batasan, tinguha-on ta ang mga butang sa langit ug huna-hunaon ta ang butang nga anaa sa langit ug dili ang yutan-ong mga butang,” sumala pa ni Vidal.

Atol sa Siyete Palabras, liboan ang nanan-aw niini. Kahinumduman nga gidili sa Kardinal ang pagpahigayon og lain pang Siyete Palabras sa mga nagkadaiyang simbahan ug bugtong ang Siyete Palabras lamang sa Katedral maoy gitugutan.

Sa laing bahin si Msgr. Achilles Dakay mipahimangno usab sa katawhan nga dili isalig sa ‘bahala na’ ang kaugmaon. Lakip na niini ang pagsalig nalang sa mga grasyang moabot gikan sa Kahitas-an ug wala gani paningkamot sa kaugalingon.

 “They should take the risk, they should use the God-given talent,” pasabot pa ni Dakay ug midugang nga ang pagkamahitas-on sa uban ug pagkahakog maoy magdala kanila sa kadaut.

“Economics without ethics dili lang dangerous to your health ug body hasta usab soul,” pasabot pa ni Dakay ug midugang usab nga kinahanglang magpabiling mainampuon ang katawhan.

Samtang si Msgr. Roberto Alesna sa iyang bahin miaghat sa katawhan sa pagpartisipar sa umaabot nga piniliay pinaagi sa pagpili og kandidatong haom sa pwesto.

Kini mao ang mga kandidatong walay kaugalingong interes ug naghuna-huna sa kaayuhan sa kadaghanan sanglit kini karon maoy dakong problema sa nasud.

Samtang ang mga botanteng dunay personal nga interes sa iyang pagbotar susama gihapon og katuyoan sa mga politikong may personal nga interes.

Malaumon ang Simbahan nga pinaagi sa ilang awhag pahimangno, ang katawhan mopili og mga kandidatong tinuoray'ng moserbisyo ug andam usab magpakamatay alang sa kaayuhan sa nasud. (BANATNEWS)