Konsehal misurambaw sa sesyon

CEBU, Philippines - Gumikan kay wala ma-quorum, napakyas ang konseho sa dakbayan sa Mandaue sa paglig-on sa mga resolusyon alang sa mga proyekto sa kabarangayan niadtong miaging Martes.

Sila si Konsehal Bethoveen Andaya ug Diosdado Suico miingon kun nanungha palang unta ang ilang mga kauban, kaaprobahan unta ang mga resolusyon alang sa mga proyekto nga may labot sa ipaayong mga kadalanan, tubig, panglawas, edukasyon pagkaon, panginabuhi ug uban pang proyekto alang sa ikaayo sa katawhan.

Si Andaya nga kanhi sakop sa mayoriyang grupo ug anaa na karon sa kampo ni Mayor Jonas Cortes miingon nga duha na ka higayon nga gihimo kini sa mga konsehal nga sakop sa kaatbang nilang kampo.

Mitambong sa sesyon mao ra sila si Konsehal Jeffy Ceniza, Diosdado Suico, siya si Andaya, Victor Biano ug Jimmy Lumapas, ug ang unom nga sakop sa kampo ni Bise Mayor Carlo Fortuna wala gyud manunga.

Gumikan niini gisaway ni Mayor Cortes ang mga konsehal nga wala motambong sa sesyon uban sa katahap nga gituyo kini nila pagsurambaw aron dili kaaprobahan ang pipila ka mga resolusyon alang sa mga proyekto nga ikaayo sa kabarangayan.

Alang kang Mayor Cortes, ang mga botante nay mohukom batok sa mga konsehal nga wala maghunahuna sa kaayohan nilang mga molupyo. – BANAT NEWS