Corro giproklamar

CEBU, Philippines - Pormal nang gi-serve sa Commission on Elections 1st division ang desisyon niining nagproklamar kang Engr. Augusto Corro ug Dr. Jose De Leon nga mao gyu’y mananaog sa milabay’ng 2007 nga eleksiyon batok nila ni Daanbantayan Mayor Sun Shimura ug inahan niining si Bise Mayor Ma. Luisa Loot.

Alas-10 sa buntag kagahapon pormal nga gihatod sa mga representante sa Comelec 1st Division ang kopya sa maong desisyon diha sa munisipyo sa lungsod nga gidawat usab ni Mayor Shimura.

Apan daling gipasabot ni Bise Mayor Loot nga bisan pa niini, siya gihapon ug ang iyang anak nga mayor ang pabiling magdumala sa lungsod tungod kay kagahapong adlawa giduso na sa ilang mga abogado ang motion for reconsideration nga nagkwestyon sa maong gipakanaog nga desisyon sa Comelec didto sa Korte Suprema.

Sila si Atty. Sixto Brillantes ug Atty. Delon Urot maoy miduso sa mosyon nila ni Shimura ug Loot.

Nunot niini nagpatawag usab si Loot sa ilang mga supporters og tigom nga nagpahibawong sila gihapon ang pabiling nagdumala sa lungsod tungod kay taas pa kaayo ang latasong proseso sa maong kaso.

Daan nang mipahibalo si Shimura nga dili nila ipasa ang katungdanan kang Corro ug de Leon hangtud nga dili writ of execution gikan sa Comelec en banc ang desisyon nga magpakanaog gyud kanila.

Apan ang kampo ni Corro mipahigayon na usab sa ilang kaugalingong pulong-pulong sulod na sa pipila ka mga adlaw human mogawas ang desisyon sa milabay’ng semana.

Si Corro ug de Leon mipahibawo sa ilang mga supporters nga mo-asumer na sila sa katungdanan sulod niining semanaha.

Niadtong milabay’ng adlaw’ng Domingo milusad og caravan ang kampo ni Corro ug de Leon sa lungsod nga nagbandilyo sa desisyon sa Comelec nga nag-reaffirm sa desisyon sa Bogo RTC nga nagproklamar nilang duha nga mao gyu’y tinuoray’ng midaug pagkamayor ug bise mayor niadtong 2007 elections. (BANATNEWS)