Tulisan nakigpinusilay, tanod angol

CEBU, Philippines - Usa ka tanod ang talandugon ang kahimtang human pusila sa gidudahang mga tulisan atol sa pagresponde niini diha sa nahitabong tulis sa dalan Juana Osmeña sa barangay Kamputhaw sa miaging gabii.

Ang tanod nga nasamdan nailhan nga si Reynaldo Quiñones, kasamtangang nagpaayo sa iyang samad pinusilan sa tiyan diha sa Chong Hua Hospital.

Samtang ang usa sa tulo ka suspetsadong tulisan ang positibong nailhan ug giilang si Joseph Yamson, 18, nga molupyo sa barangay Kamputhaw ug trabahante sa usa ka restaurant sa siyudad sa Lapu-lapu.

Usa ka Shelbie Mosqueda, 33, residente sa dalan Sanciangko maoy gikatahong gibiktima sa grupo ni Yamson ug nakuhaan og cellphone nga nagkantidad og P1, 500.

Nasayran nga si Mosqueda nag-atang og taxi sa nahisgutang lugar padulong muoli dihang kalit siyang giti-onan og armas sa usa ka lalaki ug mideklarar og tulis.

Tungod sa kahadlok wala mosupak si Mosqueda paghatag sa iyang cellphone, swerteng naagi ang nagpatrolyang mga tanod ug nakabantay sa nahitabo maong miduol kini. Sa report sa ABS-CBN Central Visayas kagahapon gikatahong nagpahatud ang biktima sa barangay hall sa usa ka taxi maong daling nakalusad og hot pursuit operation sa nahitaboan.

Apan kalit lang gipusil sa backup sa tulisan ang mga tanod ug daling nanagan. Tungod sa hitabo nangayo og tabang ang mga tanod sa Kamputhaw sa kapolisan hinungdan nga ang taga Fuente Police Station, Special Weapons and Tactics ug Mobile Patrol Group ang miresponde.

Milanat og duha ka oras ang pagpangita sa tulo diha sa palibot sa nahitaboan hangtud nga sila na-trap apan imbes nga motahan gikatahong nakigpinusilay sila sa mga awtoridad, si Quiñones nasalakan diha sa dughan dihang nagpataka og pamusil sa usa sa mga tulisan.

Sumala pa sa mga tanod nga dunay nasamdan sa mga tulisan human makigpinusilay kanila sumala pa sa samang report sa ABS-CBN Central Visayas. Matud pa ni George Ylanan sa Investigation and Detective Management Branch nga sa wala pa ang tulis giingong si Yamson nagkalingaw og inom sa iyang mga higala tungod kay birthday sa higala niining si Russel Melano.

Apan pipila ka oras ang milabay nananghid kini sa higala nga molakaw tungod kay motrabaho apan pipila ka minutos butobuto na sa armas ang nadunggan sa mga tawo.

Nasuta usab ni Ylanan diha sa gitrabahoan ni Yamson nga hangtod kagahapon wala mo-report sa trabaho. Ang Theft and Robbery Section miimbitar sa unom nga gikainom ni Yamson alang sa dugang imbestigasyon sa hitabo. - BANAT NEWS