'Flesh trade' sa Pilipinas gikonpirmar sa CAIB

CEBU, Philippines - Gidasunan sa Cebu City Anti-Indecency Board (CAIB) ang documentary sa usa ka foreign network nga nagbutyag sa pagkuyanap sa flesh trade dinhi sa Pilipinas.

Ang documentary sa Canadian Broadcasting Corporation (CBC) nga giuluhan og “Confronting Evil” gikatahong naghulagway sa pagdaghan sa teenage prostitutes sa nasud.Gani gibutyag sa maong report nga ang langyaw'ng mga turista moduaw dinhi sa Pilipinas dili tungod sa mga tourist spots kun dili tungod sa flesh trade.Wala'y pupanagana nga giangkon ni CAIB Chairman Doctor Rene Josef Bullecer nga dunay kamatuuran ang nahisgutang report.Nagtuo si Bullecer nga dunay mapahimuslanong mga tour group nga nag-operate sa nasud lakip na dinhi sa Sugbu nga tagong nag-promote sa sex tourism.“Whether we like it or not duna gyo'y daghang tour group ron nga nag-operate underground nga ang ilang gi-promote is really sex tourism,” sumala ni Bullecer.

Apan malaumon si Bullecer nga mahatagan ra gihapon og kasulbaran ang nahisgutang problema sa umaabot nga panahon.Kini kung magkahugpong ang nagkadaiyang grupo nga nakigbatok sa child trafficking ug prostitution nga naglakip sa CAIB.Nasayran hinuon nga si Senadora Loren Legarda miduso na og resolusyon sa Senado nga maimbestigahan ang gikatahong sex tourism sa nasud.Ang senadora nga maoy chairperson sa Senate Committee on Youth, Women and Family Relations gustong masayod kung unsa ang gihimo sa kagamhanan sa maong problema.

Gihulagway ni Legarda ang sex tourism nga usa ka illegal ug immoral nga negosyo nga gikinahanglang masumpo sa gobiyerno sa labing dali nga panahon.Kini samtang wala pa hingpit makahatag og dakong kadaot partikular na ngadto sa kabatan-unan ingon man sa gihulgang moralidad sa nasud.Nagtinguha si Legarda nga maimbestigahan ang gikatahong flesh trade sa Pilipinas human usab masayod sa gihimong documentary sa CBC. – BANAT NEWS