Comelec officials mag-reshuffle

CEBU, Philippines - Dunay lahugay nga himuon sa Cebu Provincial Comelec sa mga election officers sa kalungsoran ug siyudad karong sunod bulan, sumala pang election supervisor, Lionel Marco Castillano.

Gipasabot ni Castillano sa dihang nahinabi sa Banat News kagahapon nga iya kining himuon aron mawala ang pagduda sa mga kandidato nga ma-bias ang mga election officers nga nadestino sa usa ka lugar sa dugay nang panahon.

Matud ni Castillano dili kalikayan nga dunay mga kandidatung mopasangil sa usa ka election officer nga di patas, gawas lang niadtong dunay mga paryente nga magpapili sa usa ka posisyon awtomatikong ibalhin og laing lugar.

“Basin naay paryente nga nidagan, so, ato nang ibalhin gyud og laing lugar, unya amo usab susihon ang kapabilidad sa usa ka election officers nga bisan og walay paryente nga nidagan unya ang usa ka kandidato nagduda nga suod sa iyang kaatbang, ato pud na ibalhin... amo nalang ilikay kay maka-create na og partiality and impartiallity sa among election officers,” pasabot pa niini.

Matud niya nga kadtong mga E.O. nga nagpuyo sa lugar nga ilang gidestinohan, ilabay sa layo-layo nga lugar apan sulod lang gihapon sa probinsya sa Sugbu, apan siya niklaro nga human sa eleksyon sunod tuig mabalik na sa ilang karaang assignments. Nanghinaot si Castillano nga susama ra sa milabay’ng eleksyon ang umaabot piniliay karung sunod tuig nga malinawon kaayo sukwahi sa ubang lugar nga grabe ang kagubot nga motumaw sa mga kaatbang sa politika ug sa mga supporters niini. (Rey Pasaporte)    (BANATNEWS)