Oposisyon ug administrasyon magbangga

CEBU, Philippines - Usa ka sakop sa oposisyon ug ang usa usab sa administrasyon sa dakbayan sa Carcar ang posibleng magkabangga sa pagkamayor sa maong lugar sa umaabot nga eleksiyon sa tuig 2010.

Sila mao si Bise Mayor Nicepuro Apura   sa oposisyon ug si Konsehal Nestor Velez sa administrasyon .

Si Bernadith Barcenas, konsehal sa barangay Guadalupe mibutyag nga kompleto na ang line-up ni Apura.

Matud sa konsehala nga si Apura walay running mate ug ang grupo niini nagkasabot nga mosuporta kang Mayor Patrick Barcenas kinsa last term na sa iyang posisyon karon ug nagplanong modagan isip bise mayor ubos sa line-up ni Velez.

Si Bernadith kinsa chairman sa komitiba sa Kababayen-an ug Kabataan nagplano usab nga modagan isip konsehal sa dakbayan.

Gawas kang Bernadith , si Val Sandiego nga usa ka choreographer ug art director sa ikaduhang higayon mosuway na usab pag-apil sa politika ug gustong magkonsehal.

Si Sandiego, 47-anyos kinsa maoy hepe sa Carcar Heritage and Conservations Society (CHCS) midagan isip mayor sa siyudad niadtong tuig 2007 apan napildi kini ni Mayor Barcenas.

Matud niya nga iyang mga kagikan taga Carcar ug bisan og naa sa dakbayan sa Sugbo ang iyang negosyo apan matag semana mouli siya diha sa ilang ancestral home sa Carcar.

Si Sandiego ug Bernadith pulos parehong ubos sa grupo ni Apura. (Brenda D. Batuto)    (BANATNEWS)